| | ||||||
| | |||||||
കേരളത്തില്‍ വിജയദശമി ദിവസം ജ്ഞാന ദേവതയായ സരസ്വതിയെ പൂജിച്ച് വിദ്യാരംഭം കുരിക്കുന്നു. ഹരി ശ്രീ എഴുതിയശേഷം ഭാഷയിലെ അന്‍പത്തി ഒന്നക്ഷരങ്ങളും എഴുതിക്കുന്നു.
അക്ഷരമാലയിലെ 51 ലിപികള്‍ കേവലം ലിപികളല്ല, മന്ത്ര ശാസ്ത്രത്തിന്‍റെ അടിസ്ഥാന ശക്തികള്‍ കൂടിയാണ്. മന്ത്രശാസ്ത്രത്തില്‍ ഇവയെ മാതൃകാ അക്ഷരങ്ങളെന്നാണ് പറയുക.അതുകൊണ്ട് വിദ്യാരംഭം അക്ഷര പൂജ ചെയ്യുന്ന ഒരു താന്ത്രിക ക്രിയയായി വേണം കരുതാന്‍.
ആയുധപൂജ
നവരാത്രി ഉത്സവത്തിന്‍റെ ഏറ്റവും പ്രധാനപ്പെട്ട ചടങ്ങ് പൂജയാണ്. കേരളത്തില്‍ ദശമി വരെയുള്ള അവസാനത്തെ മൂന്നു ദിവസത്തെ ആചാരങ്ങള്‍ക്ക് ആയുധപൂജ എന്നു പൊതുവേ പറയാറുണ്ട്.
തന്ത്ര ശാസ്ത്രത്തില്‍ പൂജ, ഹോമം, ബലി, തര്‍പ്പണം എന്നീ ക്രിയകളാണ് അനുഷ് ഠാനങ്ങളുടെ പ്രായോഗിക സ്വരൂപം. ഇവിടെ പൂജയ്ക്കാണ് പ്രാധാനം.
നവരാത്രി ആഘോഷത്തിന്‍റെ എട്ടാം ദിവസം വൈകുന്നേരത്തോടെ തൊഴിലാളികളും കരകൗശലപണിക്കാരും ഉദ്യോഗസ്ഥരുമെല്ലാം അവരവരുടെ തൊഴിലുപകരണങ്ങളും വിദ്യാര്‍ത്ഥികള്‍ പാഠപുസ്തകങ്ങളും പേനയും മറ്റും പൂജയ്ക്കു വേണ്ടി സമര്‍പ്പിക്കുന്നു.
നവമി ദിവസം അടച്ചുപൂജയാണ്. പത്താം ദിവസം വിജയദശമി. അന്നു കാലത്ത് പൂജയ്ക്കു ശേഷം കിട്ടുന്ന പണിയായുധങ്ങള്‍, തൊഴിലുപകരണങ്ങള്‍, പാഠപുസ്തകങ്ങള്‍ എല്ലാം ജീവിതവിജയത്തിന് ആവശ്യമായ ദൈവീകാനുഗ്രഹം സിദ്ധിച്ചവയായിരിക്കും എന്നാണ് വിശ്വാസം.
| | ||||||
| | |||||||
 | ||||||||||||
അക്ഷര പൂജയിലൂടെ അറിവിനേയും ആയുധ പൂജയിലൂടെ പ്രവൃത്തിയേയും കച്ഛപി (വീണ പോലുള്ള സംഗീത ഉപകരണം) കലകളേയും ഉപാസിക്കുകയാണ് കേരളീയര്‍ ചെയ്യുന്നത്. എന്നാല്‍ ബംഗാളില്‍ നവരാത്രി ദുര്‍ഗ്ഗാപൂജ ആയായാണ് ആഘോഷിക്കുന്നത്. കര്‍ണ്ണാടകത്തില്‍ ഇത് ദസറയാവുന്നു.
അറിവില്ലായ്മയുടെ പര്യായം ആയിരുന്ന മഹിഷാസുരനെ കൊന്ന് അറിവിന്‍റെ ദേവതയായ ആദിപരാശക്തി വിജയിച്ച ദിവസമാണ് വിജയദശമി. ശ്രീരാമന്‍ വനവാസം കഴിഞ്ഞ് അയോധ്യയില്‍ തിരിച്ചെത്തിയത് നവരാത്രിക്കാണെന്ന് വിശ്വാസമുണ്ട് (ദീപാവലിക്കാണെന്നാണ് മറ്റൊരു വിശ്വാസം).
പാണ്ഡവന്‍‌മാര്‍ കുരുക്ഷേത്ര യുദ്ധം ജയിച്ചതും വനവാസ കാലം പൂര്‍ത്തിയാക്കിയതും വിജയദശമി ദിവസത്തിലാണെന്ന് കരുതുന്നു.
കേരളത്തില്‍ നവരാത്രിക്ക് പ്രധാനമായും സരസ്വതീ പൂജയാണ് നടക്കുന്നത്. കര്‍ണ്ണാടകത്തിലെ കൊല്ലൂര്‍ മൂകാംബികാ ക്ഷേത്രമാണ് ഇന്ത്യയിലെ തന്നെ പ്രസിദ്ധമായ സരസ്വതീ ക്ഷേത്രങ്ങളില്‍ ഒന്ന്. ശങ്കരാചാര്യര്‍ ആണ് ദേവിയെ കൊല്ലൂരില്‍ പ്രതിഷ്ഠിച്ചത് എന്നാണ് വിശ്വാസം.
കേരളത്തില്‍ സരസ്വതീ ക്ഷേത്രങ്ങള്‍ പൊതുവേ കുറവാണ്. വടക്ക് കണ്ണൂരിലെ പള്ളിക്കുന്നില്‍ ദക്ഷിണ മൂകാംബികാ ക്ഷേത്രമുണ്ട്. മധ്യത്തില്‍ വടക്കന്‍ പറവൂരില്‍ സരസ്വതീ ക്ഷേത്രമുണ്ട്. തെക്ക് കോട്ടയത്തെ പനച്ചിക്കാട്ടാണ് മറ്റൊരു സരസ്വതീ ക്ഷേത്രം. തിരുവനന്തപുരത്ത് വട്ടിയൂര്‍ക്കാവിലെ അറപ്പുരയില്‍ ഒരു ചെറിയ സരസ്വതീ ക്ഷേത്രമുണ്ട്.
നവരാത്രി കേരളത്തിലെ മിക്കവാറും എല്ലാ ദേവീക്ഷേത്രങ്ങളിലും ആഘോഷിക്കുന്നു. ദേവീ പ്രതിഷ്ഠയുള്ള മഹാക്ഷേത്രങ്ങളിലും നവരാത്രി ആഘോഷങ്ങള്‍ നടക്കാറുണ്ട്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ